Leiarane i FAU og SU/SMU har stila brev til Lærdal kommune i samband med handlingsplan mot mobbing

Det er i dag stila brev til Lærdal kommune ved administrativ skuleleiing og politisk skuleleiing ved formannskapet og kommunestyret. Originaldokumentet finn du her.

Handlingsplan mot mobbing ved Lærdalsøyri skule 

Leiar og nestleiar for FAU ved Lærdalsøyri skule, vil syna til vesentlege utfordringar som Lærdal kommune har hatt i høve til skuleelevar sitt psykososiale skulemiljø. Me skal ikkje gå i detalj rundt dette, men kort nemne at desse utfordringane bør vere kjent for både administrativ skuleleiing og politisk nivå. Utfordringar på både system- og individnivå.

Lærdal kommunestyre handsama “Tilstandsrapport for grunnskulen i Lærdal” i møte den 21. juni -12. I kommunestyret si drøfting av saka, vart det frå politikarane særskilt etterlyst ein handlingsplan mot mobbing.

FAU har gjennom mange år prøvd å få til eit større og breiare fokus på eit godt skule og oppvekstmiljø for borna våre sin kvardag. Dei seinaste tre åra har me arbeidt for å få på plass ein funksjonell handlingsplan mot mobbing.

Etter årelange prosessar ser me at me likevel ikkje har lukkast i å aksept for viktigheita av å få på plass eit skriftleg verktøy som kan bidra i det viktige arbeidet mot mobbing. Me skal ikkje spekulere i kva krefter som har gjort seg gjeldande i motstanden for å få på plass ein funksjonell handlingsplan mot mobbing, berre diverre konstantere at desse synes å ha ein karakter som gjer at det synest meiningslaust å engasjere seg som foreldre i brukarorgan som FAU og SU/SMU.

Vedlagte handlingsplan mot mobbing vart samrøystes oversendt FAU og SU/SMU frå den tredje arbeidsgruppa som (gjennom dei seinaste tre åra) har arbeidt med planen. Leiar for arbeidsgruppa var rektor. FAU og SU/SMU har samrøystes godkjent handlingsplanen. Sistnemnte gjennom vedtak med følgjande ordlyd;

Samarbeidsutvalet (SU) og Skulemiljøutvalet (SMU) ved Lærdalsøyri skule godkjenner arbeidsgruppa sin framlagde ”Handlingsplan mot mobbing”, med inntekne endringar. 

Som oppfølging av tidlegare politisk etterlysing omkring skulen sitt arbeid mot mobbing, jfr kommunestyret sin handsaming av ’Tilstandsrapport for grunnskulen i Lærdal’ i juni -12, sender SU/SMU planen til Lærdal kommunestyre og ber om at handlingsplanen også vert politisk handsama og vedteken. Dette for ei nærare politisk tydeleggjering av at arbeidet mot mobbing skal ha høgt fokus i skulane i Lærdal kommune. 

SU/SMU vonar at handlingsplanen vil bli nytta som eit aktivt reiskap for vidare arbeid og utvikling av gode rutinar og handlingar i vårt felles arbeid for eit best mogleg psykososialt skulemiljø, med trivsel og tryggleik som rettesnor.

Formelt kan brukarorganet SU/SMU ikkje gjera anna enn å gje ein uttale i saka om handlingsplan mot mobbing. I dette tilfelle som godkjenning av arbeidsgruppa sin framlagde handlingsplan.

At handlingsplanen no likevel synest å ikkje bli gjort gjeldande og nytta, framstår som særs underleg og uforståeleg. Dette ut frå at arbeidsgruppa, leia av rektor ved Lærdalsøyri skule, den 23. april oversendte ein ferdig utarbeida handlingsplan som også samrøystes vart godkjent i brukarorgana FAU og SU/SMU.

På fjerde (4) året skal det visstnok no opprettast ei fjerde (4) arbeidsgruppe som skal utarbeide ein ny handlingsplan mot mobbing. Ei arbeidsgruppe med heilt nye medlemmer, jfr at dei ulike representantar for dei ulike brukarorgana som SU/SMU, FAU og elevråd går ut av sine verv ved skuleslutt 20. juni.

For å illustrere den nærast endelause prosessen kring arbeidet med å få etablert ein handlingsplan mot mobbing ved Lærdalsøyri skule gjennom dei seinaste tre åra, har me lagt ved ei A-4 side som datofestar dei vesentlegaste hendingane i prosessen. Alle med link til gjeldande dokument og vedtak som er omtalt.

På vegne av foreldra ved Lærdalsøyri skule, og våre elevar, ber me no om at det vert synt klokskap frå vår nye kultur- og oppvekstleiar i saka. Dette gjennom at det vert sytt for at utarbeida handlingsplan mot mobbing vert tatt i bruk slik den i dag er godkjent og ligg føre. Om det skulle vere feil eller vesentlege manglar ved planen, så bør dette kunne rettast opp administrativt. Dessutan er det lagt opp til årvis evaluering og godkjenning av handlingsplanen i SU/SMU, jfr pkt 4.4.

Me ber såleis om at godkjent Handlingsplan mot mobbing for Lærdalsøyri skule vert tatt i bruk og lagt fram til politisk handsaming i Lærdal kommunestyre den 20. juni, i tråd med vedtak frå SU/SMU av 11. mars -13 og 13. mai -13.

Lærdal, den 16. mai 2013

Med helsing

Hadle Blikra

leiar FAU og nestleiar SU/SMU

Øyvind Hamre

leiar SU/SMU og nestleiar FAU

Handlingsplan mot mobbing er no endeleg på plass!

FAU er særs glad for at me no har fått ferdigstilt Handlingsplan mot mobbing. Planen har vore arbeida med gjennom dei seinaste tre åra og er no godkjent av Samarbeidsutvalet (SU) og Skulemiljøutvalet (SMU) ved Lærdalsyri skule. SU/SMU ber i vedtaket om at handlingsplanen også vert politisk handsama av kommunestyret. Dette også som oppfølging av Tilstandsrapport for grunnskulen i Lærdal, som vart handsama av kommunestyret i 21. juni -12, jfr pkt 2.2.2. i tilstandsrapporten. Det står også eit samrøystes foreldrearbeidsutval (FAU) bak framlagde handlingsplan.

Det har vore ein lang prosess med å få plass handlingsplanen som erstatning for den planen som fram til hausten 2010 hadde vore gjeldande. Det har vore tre ulike arbeidsgrupper som har arbeidt med å få etablert handlingsplanen. Alle tre gruppene har vor leia av skuleleiinga, dei seinaste to åra av rektor. SU/SMU har sidan hausten -10 gjort årlege vedtak om at handlingsplanen skal ferdigstillast. I løpet av skuleåret 2012/13 har SU/SMU gjort tre vedtak om at handlingsplanen skulle stå ferdig i løpet av våren. Og no, tre år etter at FAU tok initiativ til å få på plass ein funksjonell handlingsplan mot mobbing, står den endeleg klar!

Handlingsplanen er eit verktøy for både oss foreldre, elevar og skulen sine tilsette. Den er vonaleg informativ, enkel og konkret i si utforming. Det er ikkje ein statisk plan, men snarare eit utgangspunkt for vidare arbeid og utvikling av gode rutinar og handlingar i vårt felles arbeid for eit best mogleg psykososialt skulemiljø, med trivsel og tryggleik som rettesnor. Det blir spanande å følgje med på korleis planen vert vidareutvikla framover, og om den vert eit aktivt arbeidsredskap for skulen sine tilsette.

FAU har tidlegare vore delaktig i diskusjonen kring kommunen sitt oppvekst- og læringsmiljø. Dette i samband med at me i april -11 valde å ikkje signere og godkjenne kommunen sitt lokale mobbemanifest under ei markering i kommunestyret. Eit lokalt mobbemanifest som ei heller har vore fulgt opp gjennom praksis i etterkant. Foreldrearbeidsutvalet har såleis eit ynskje om at Lærdal kommune på ny set opp temaet oppvekst- og læringsmiljø på dagsorden, og vil gjerne i så måte bidra i revisjon av eit lokalt mobbemanifest som er forankra i alle naturlege fora.

FAU kjem med innspel om innkjøp av mobil ‘modul-scene’

Høyring budsjett 2013 – innkjøp av mobil modulbasert scene til bruk i bygda vår

FAU ved Lærdalsøyri skule har i lengre tid sett trongen for tilgjengeleg kommunal mobil scene som kan nyttast til glede for bygdefolket.

Løysingar som i dag vert nytta er kostnadskrevjande innleige og midlertidige, arbeidskrevjande sjølvbygde løysingar. Me har tru på at både lokale lag og organisasjonar vil kunne ha stor nytte av ei tilgjengeleg lokal scene. Me ser også at vår flotte idrettshall vil få auka funksjonalitet som ’fleirbrukshall’ om Lærdal kommune investerer i ein mobil ’modul-scene’. Bruksområda er mange og varierte.

Kostnader til innkjøp av ei scene vil raskt kunne tenast inn igjen gjennom leigeinntekter. Ansvar og drift bør liggje til kommunen. FAU vil tru at det også er vilje frå ulike lokale aktørar til å bidra med finansiering.

FAU vil ut frå ovannemnde be Lærdal kommunestyre – i samband med budsjetthandsaminga for 2013 – vurdere å setje av midlar til ei sjølvfinansierande mobil og modulbasert scene.

 

(Uttalen er samrøystes vedteken i FAU den 3. desember -12, sak 5) 

FAU sin høyringsuttale på utlagte budsjett

Budsjett 2013 og Økonomi og handlingsplan 2013 – 2016

Driftsbudsjett 2013

Utlagde driftsbudsjett – samt tilgjengelege grunnlagsdokumentasjon for dette – er ikkje tilfredsstillande i høve til oss som brukargruppe. Det er eit lite informativt og tilgjengeleg budsjett i høve til korleis drifta ved Lærdalsøyri skule vert komande år. Dette spesielt i samband med pedagogiske personalressursar og vikarløysingar, samt til anna drift og tiltak. Me syner her også til vår omtale nedanom i høve til at det må setjast av midlar til skuletur for noverande 10. klasse våren -13.

FAU har også merka seg spesielle utfordringar kring skuleskyss for delar av kommunen. Dette i høve til både manglande fleksibilitet i skyssordninga – og til manglande sakshandsaming og rutinar kring dialog med brukarar som er avhengig av skuleskyss. Også i desse sakene opplever foreldre å måtte vente i månader på svar frå Lærdal kommune.

FAU stør gjennomgang og evaluering av korleis dei spesialpedagogiske tiltaka vert praktisert ved Lærdalsøyri skule. Kva konsekvensar ein samla reduksjon på ein million kroner for spesialpedagogiske tenester (for oppveksteininga – skule og barnehage – i kommunen) vil føre til, kan likevel ikkje FAU uttale seg om. Me ber likevel om at FAU som brukargruppe vert trekt inn i arbeidet med gjennomgangen.

Økonomi og handlingsplan 2013 – 2016

FAU ved Lærdalsøyri skule ser med uro på at fleirtalet i formannskapet nok ein gong har valt å utsette investeringa i opprusting av uteområde med leikeapparat til mellomtrinnet på LØS. No til 2014. Midlane til utomhusplan på LØS er og valt utsett til 2014. I framlegget frå rådmannen låg desse postane inne i budsjett for 2013 med kr 500.000,- til leikeapparat og kr 900.000,- til utomhusplan.

Dette er tiltak me som foreldre har venta lenge på gjennomføringa av, og særskilt investeringa i leikeapparat til uteområdet til mellomtrinnet ser me på som spesielt viktig å få gjennomført så snøgt som råd.

Klassane på mellomtrinnet har slitt med uro og erting/mobbing fordi elevane ikkje har positive aktivitetar å sysselsette seg med i friminutta. Desse elevane kjem frå det flotte uteområdet på barnetrinnet, til ingenting på mellomtrinnet – berre ein stor ’asfaltørken’. Ein har lenge sett behov for å ruste opp uteområdet til mellomtrinnet, men dette har stadig vorte utsett.

LØS fekk i samband med ”Vennskapsveka” på mellomtrinnet no i haust, handla inn nokre enkle leiker og ballspel, og elevane laga og sjølv leiker og merka opp område til leikar på asfalten. Dette har skulen allereie merka positiv effekt av – elevane er meir engasjert i positiv leik i friminutta og rolegare i timane.

At LØS no misser moglegheita til å fylgje opp dette særs gode og vellukka tiltaket med ordentlege investeringar i uteområdet på mellomtrinnet, ser FAU difor på som særs uheldig. Me vil såleis sterkt oppmode kommunestyret om å ta midlane til investering i utområdet til mellomtrinnet inn att i investeringsbudsjettet for neste år – 2013.

Skuletur for 10. klassane – 2012/-13 – våren 2013

FAU syner innleiingsvis til at praktisering av den tradisjonelle skuleturen for 10. klassen har vore eit utfordrande og årleg tema dei seinaste fire åra. Manglande avklaringar har skapt mykje frustrasjon i både lærargruppe, elev- og foreldregruppe. Foreldregruppene i dei seinaste 10. klassane og FAU, har nytta mykje tid og krefter på å få på plass dei naudsynte avklaringar. Diverre utan å lukkast. Dei årlege frustrasjonane vert halde oppe – fordi det ikkje vert synt vilje til å få på plass dei naudsynte avklaringar.

FAU vil syne til Lærdal formannskap den 2. mars -10 (i sak 38/10), gjorde vedtak i samband med korleis den tradisjonelle 10. klasseturen skal organiserast og finansierast;

”[...] Når det gjeld skuleturar frå 2011 skal turar som skjer innanfor skuleperioden og vert rekna som grunnskuleopplæring etter Opplæringslova, kun finansierast med dugnad og eigeninnsats. Det må også vere høve for å søkje om gåver frå kommune og næringslivet, men ikkje frå foreldra. Dette må vere eit prinsipp som gjeld alle skulane i kommunen. Opplegg for skuleturar finansiert med dugnad og eigeninnsats, skal frå 2011 vera styrt, tinga og organisert av den einskilde skule.”

Vedtaket var samrøystes og er framleis gjeldande, trass i at FAU gjennom år har bedt om avklaringar i høve til ulike problemstillingar i saka, jfr her mellom anna vår høyringsuttale av 16.02.12.

Uavklart status i saka fører til at noverande 10. klassar ikkje har oversikt over kva ordning som vert gjeldande for deira skuletur. Ein skuletur som dei gjennom heile grunnskuletida har gledd seg stort til. Foreldregruppa for noverande 10. klassetrinn har ikkje fått naudsynte avklaringar i det heile, jfr deira seinaste purrebrev av 27.11.12.

I samband med høyring på utlagt årsbudsjett for Lærdal kommune – vil FAU ved Lærdalsøyri skule – sterkt oppmode kommunestyret å be administrasjonen leggje til rette for at noverande 10. klasse får gjennomført sin lenge planlagde skuletur til England våren -13. Dette gjennom eit samarbeid med foreldregruppa i 10. klassane. Det vert spesielt synt til at elev- og foreldregruppa – gjennom omfattande dugnadsarbeid – har samla inn eit vesentleg økonomisk bidrag til den planlagde skuleturen. Me ber såleis kommunestyret om at også Lærdal kommune bidreg med økonomiske midlar til å få gjennomført skuleturen i tråd med det som er vist til ovanom.

Avslutningsvis vil FAU peike på at det må arbeidast vidare med kva ordningar som skal gjelda for desse skuleturane for seinare år.

Politisk handsaming av innkomne høyringsfråsegner

Avslutningsvis vil FAU ved Lærdalsøyri skule peike på korleis Lærdal kommune praktiserer handsaminga av høyringsfråsegn i samband med utlegg av budsjett og handlingsplan, jfr kommunelova § 44 nr 7 og § 45 nr 3.

Etter det FAU kjenner til, har det vore tradisjon for at formannskapet sjølv har handsama innkomne høyringsfråsegn og gjort framlegg til kommunestyret om ny innstilling til endra budsjett ut frå ulike innspel som har kome inn i utleggsperioden. FAU vil peike på at ei slik praktisering truleg ikkje er i tråd med kommunelova og at denne praktiseringa i så fall vil vere ein sakshandsamingsfeil.

Me vil – som brukargruppe – peike på viktigheten av at innkomne høyringar vert debattert i kommunestyret utan å først ha vore handsama i formannskapet. Me meiner at dette gjer ein vesentleg sterkare politisk- og demokratisk legitimitet til handsaminga av dei ulike høyringsfråsegna som kjem inn i høve til kommunen sine budsjett og økonomiplan.

 

(Uttalen er samrøystes vedteken i FAU den 3. desember -12, sak 3)  

Nytt skuleår 2012 / 2013

Foreldrearbeidsutvalet har fått ny samansetjing. Me ynskjer dei nye foreldrerpresentantane velkomne – og nyttar samstundes høve til å takke dei representantane som gjekk ut frå FAU no i vår!

FAU har hatt konstituerande møte (18.10.12) og du kan lese referatet ved å klikke deg inn på “Møtereferat” på høgre side – eller klikke her. FAU har invitert rektor og rådgjevar til neste møte i FAU den 7. november.

Det er vidare avholdt møte i SU/SMU den 1. november. Referat vil bli lagt ut når dette er klart.

I samband med at me som utval har opplevd utfordringar i høve til arbeidet vårt, vart det i siste møte før sommaren uttrykt ynskje, (jfr brev til kommuneleiinga), om eit overordna dialogmøte mellom politisk- og administrativ kommuneleiing og leiinga i FAU. Dette vart halde den 21. august -12, (jfr referat). Det er vidare  planlagt nytt oppfølgingsmøte, (jfr brev).

Forrige skuleår handsama FAU heile 52 saker, fordelt på 8 møter. Det vart ikkje skreve årsmelding, men aktiviteten og sakene som er arbeidt med gjennom året, er gjort kjent gjennom heimesida vår.

Me gler oss til eit vidare godt samarbeid med kvar einskild tilsett ved skulen – og vil også her nytte høve til å ynskje ny skuleleiing velkomen til skulen vår! Me har god von om at  me i lag får til ein konstruktiv dialog og gjensidig ansvarleggjering – for eit best mogleg samarbeid mellom oss foreldre som brukargruppe og skulen som tenesteytar.

Følg med oss på heimesida og facebook-sida vår. Og kom gjerne med innspel og kommentarar til oss gjennom både desse nettstadene og gjennom klassekontaktane som alle er representert i FAU!

Me ser fram til eit spanande skuleår!

Fylkesmannen gjer ikkje FAU medhald i klagesak

Kommunen sitt avvisningsvedtak av 1. juni -12, vert såleis stadfesta.

Fylkesmannen skriv mellom anna i sitt vedtak av 5. september -12;

“Vikarløysinga ved skulen eller manglar ved denne er ikkje eit enkeltvedtak og er ikkje gjenstand for klagerett etter forvaltningslova eller opplæringslova. Budsjettvedtaket er heller ikkje eit enkeltvedtak, og kan difor heller ikkje påklagast. Fylkesmannen må avvise saka, då vi ikkje kan sjå at det er heimel for å handsame saka som ei klagesak. Vi vil likevel kort rettleie om regelverket kring dei punkta som er påpeika.”

Fylkesmannen skriv vidare;

“Når det gjeld manglar ved ordinært opplæringstilbod, er det viktig at føresette og FAU er engasjerte og gir beskjed til kommunen dersom dei opplever manglar ved elevane sitt skuletilbod. Formålet med slik dialog og samarbeid vil vere å sikre at elevane får eit opplæringstilbod i tråd med lova”.  

Fylkesmannen avslutter sitt brev med fylgjande;

“Fylkesmannen har etter opplæringslova § 14-1 heimel til å føre tilsyn med at kommunen oppfyller dei pliktene dei er pålagde i eller i medhald av opplæringslova. Vi forstår saksdokumenta slik at det ikkje vert klaga på opplæringsforholda slik dei er no, men slik dei var i starten av året, og at dette seinare er retta opp i. På noverande tidspunkt er det ikkje aktuelt med tilsyn frå vår side.”

Saka handlar om FAU sin opprinnelege klage av 16. februar -12 – der me klagde på at det vart gitt eit manglande undervisningstilbod ved Lærdalsøyri skule. Kommunen avviste denne klagen gjennom eit avvisningsvedtak av 1. juni -12.

Dette avvisningsvedtaket vart av FAU vidare bragt inn for Fylkesmannen gjennom klage av  16. juni -12, og det er såleis denne klagen som Fylkesmannen ikkje gjer oss medhald i. Dette med grunngjeving i at Lærdal kommune hadde rett til å avvise vår opprinneleg klage, med grunnlag i at lova ikkje gjer oss foreldre ein rett til å få vår klagesak handsama, (manglande klagerett).

Du kan lese Fylkesmannen sin saksutgreiing, med vurdering og vedtak av 5. september -12, her.

FAU ber om bistand til å få bragt klagesaka vår fram til avgjerd hjå Fylkesmannen

Kommunen si mangelfulle handsaming av FAU si klagesak om manglande undervisningstilbod ved Lærdalsøyri skule, vil visst ingen ende ta.

Klagen vår vart sendt Lærdal kommune den 16. februar i år. Først den 1. juni fekk FAU svar. Dette etter mange purringar og fleire medieoppslag. Klagen vart avvist uten at den var realitetshandsama. Innhaldet i klagen vart det altså ikkje tatt stilling til. Lærdal kommune grunngjer avvisninga med at FAU som brukarorgan ikkje har klagerett på det manglande undervisningstilbodet som vart gitt.

Den 16. juni klagde FAU på avvisningsvedtaket. Dette for å få realitetshandsama klagen vår i tråd med gjeldande føresegner.

Formannskapet (som kommunalt klageorgan) handsama klagen i møte den 6. juli, i sak 62/12. Rådmannen sitt vedtak i saka vart opprettholdt.

FAU stila i forkant brev til Lærdal kommune og formannskapet (brev av 1. juli -12), der me ba opplyst om kva midlar som skulle ha vorte tilført Lærdalsøyri skule i samband med at det i møte den 23. februar – altså ei veke etter at kommunen hadde motteke FAU sin klage – vart bestemt at det skulle nyttast vikarar ved sjukefråvær. Dette er opplysningar som kjem fram i kommunen sitt ovannemnde svarbrev/vedtak av 1. juni.

Dette spørsmålet har det vore vanskeleg å få klarheit i, men gjennom etterlysing av svar og svarbrev frå rådmannen av 24. juli, har me endeleg fått klarlagt at denne opplysninga i vedtaket ikkje er korrekt.

Det er alvorleg at den kommunale forvaltninga er missvisande i si saksutgreiing og såleis bevisst gjer ei feil framstilling av fakta i saka.

Med bakgrunn i FAU sin erfaring med Lærdal kommune sin ugrunna tidsbruk i handsaming av klagesaka vår – og manglar i den kommunale forvaltningspraksis - har me fulgt opp i kva grad kommunen har bragt klagesaka vidare til Fylkesmannen som klageorgan. Me har pr dato ikkje fått svar på vårt brev til Lærdal kommune av 24. juli, der me ber om svar på om klagesaka er sendt vidare til Fylkesmannen for avgjerd.

Gjennom kontakt med Fylkesmannen i Sogn og Fjordane den 26. juli, får me imidlertid opplyst at klagesaka vår endå ikkje er motteken.

For at me skal få handsame klaga vår etter gjeldande regelverk, har FAU såleis i dag stila brev til Fylkesmannen i Sogn og Fjordane og bedt om hjelp til å få Lærdal kommune til å få bragt saka vidare til avgjerd hjå Fylkesmannen.

Brevet er også sendt formannskapet i Lærdal, samt kontrollutvalet. Dette for – om mogleg – få eit overordna systemfokus på ein manglande og gjennomgåande kritikkverdig forvaltningspraksis, som FAU gjennom sitt arbeid har fått erfart gjennom dei seinaste åra.