Me har difor – samrøystes – valgt å retta ein formell klage til skuleeigar om situasjonen. Denne skal handsamast etter gjeldande forvaltningsrettslege reglar. Klageinstans er såleis Fylkesmannen i Sogn og Fjordane.

Oversendt klage lyder;

Klage på manglande undervisningstilbod ved Lærdalsøyri skule

Foreldrearbeidsutvalet (FAU) ved Lærdalsøyri skule vil med dette setja fram ei formell klage på manglande undervisningstilbod ved Lærdalsøyri skule. Klaga er fatta av eit samrøystes FAU i møte den 16. februar 2012, i sak 9.

Me vil innleiingsvis syna til at denne klagen ikkje handlar om den faktiske undervisninga som i dag vert gitt ved skulen, men om det me vil syna til er eit bevisst manglande undervisningstilbod.

I samband med budsjettarbeidet for 2012, vart det både av rektor og rådmann peika på den utfordringa som låg føre i samband med at formannskapet ikkje hadde budsjettert med bruk av vikarar ved Lærdalsøyri skule. Dette vart også peika på av FAU ved Lærdalsøyri skule i samband med høyringsuttalen vår. I pkt 2.3 peikar me mellom anna på at dette vil få som konsekvens at elevane ikkje får den undervisninga dei rettmessig har krav på. Det vart her synt til at rektor hadde varsla at heile skuleklassar ville risikere å berre få tilsyn – eller permitert.

Kommunestyret – som skuleeigar – tok ikkje omsyn til dette under si budsjetthandsaming i desember 2011.

Rapport frå rektor syner at skuleklassar ikkje får rettmessig undervisning grunna manglande vikarløysingar. I e-post av 6. februar frå rektor til klassekontaktane står mellom anna;

Vikarsituasjonen

Det har vore ein del fråvær i tilsettgruppa i januar månad. Leiinga har lagt ned ein del arbeid for å sikre at elevane  skal få det undervisningstilbodet dei har rett på.  Situasjonen har vore krevjande.  Vi har ikkje permittert klassar, men av og til har storklassar blitt oppretta (t.d samanslåing av 8A og  8B), av og til har ufaglærte hatt opplegg og tilsyn med klassar, av og til har gruppe og klasse blitt slått saman.  Assistentar og pedagogar har blitt flytta dit det er naudsynt.  Ein time vart ein klasse utan tilsyn.  Det skuldast ei mistyding.

Me stiller spørsmålsteikn med om skuleadministrasjonen ved rektor reknar ovanfor nemnde; ’ufaglærte hatt opplegg og tilsyn av skuleklassar’, som eit rettmessig ’undervisningstilbod’?

FAU har forståing for at det gjennom eit skuleår tidvis kan skje uforutsette hendingar som kan føra til at ein må finna løysingar som ikkje er optimale for undervisninga. Me har likevel ikkje forståing for at skuleeigar bevisst – gjennom sitt budsjettvedtak – tek avgjerd om å gje elevane eit manglande undervisningstilbod. Ei ’planlagd’ løysing der fråvær ikkje skal dekkjast opp av vikarløysingar. Dette er ein situasjon som klårt er i strid med reglane i Opplæringslova.

Me som foreldre kan såleis ikkje akseptere at skuleeigar ikkje legg til rette for bruk av vikarar ved fråvær. Me kan heller ikkje venta på at skuleeigar – på eige initiativ – tek fatt i denne problemstillinga – då noverande mangel på undervisningstilbod for elevane allereie er lovstridig.

FAU vil her også syna til at skuleeigar – gjennom vedtak i formannskapet (sak 11/12 – den 14. februar ) – heller ikkje ville tilføre Lærdalsøyri skule midlar (kr 190.000,-) som ved ei evt omdisponering kunne ha vorte nytta til innleige av vikarar. Dette syner at skuleeigar – etter FAU si meining – ikkje ser ut til å ta den alvorlege undervisningssituasjonen ved Lærdalsøyri skule på alvor slik situasjonen er pr i dag.

Dette dannar grunnlag for at me i FAU rettar ei klage til skuleeigar. Denne skal handsamast i tråd med gjeldande forvaltningsrettslege reglar, jfr Opplæringslova kap 15.

Takk for invitasjonen!

Me set pris på at me som brukarar av ei viktig kommunal teneste blir invitert til å orientera om FAU sitt arbeid.

Foreldrearbeidsutvalet ved Lærdalsøyri skule er samansett av 2 foreldrerepresentantar frå kvart klassetrinn. Eg vil påstå at me har kommunens beste kjønnssammensetning i utvalgssamanheng – nemleg 10 kvinner og 10 menn. Altså 50% av begge kjønn. Dette har me også vedtektsfesta.

FAU representerer foreldra til i overkant av 200 barn. Kreativ reknemåte skulle tilseie at me representerer om lag 400 vaksne foreldrepersonar og 200 barn – 600 til saman. Det er i overkant av 25 % av kommunen sin befolkning!

Kven er det som har ansvaret for ungane våre si opplæring? Både folkeretten og norsk lovgivning er klar på at det er foreldrene som har ansvaret for å gje barna utdanning. Både i barnelova (§ 30) og i opplæringslova finn me reglane som regulerer desse forholda. Foreldra har såleis ei ”opplæringsplikt” og ein ”rett” til offentleg grunnskuleopplæring (§ 2-1). Men det er ikkje skuleplikt i Noreg i dag.

Denne ansvarsavklaringa er interessant fordi me som foreldre dagleg – gjennom 10 års skulegang – delegerer den vesentlegaste delen av dette opplæringsansvaret til skulen vår. Og då vil me sjølvsagt ha det best moglege opplæringstilbodet til ungane våre! Og me vil ha eit opplæringstibod som er i tråd med dei forventningar me har som foreldre, og til dei nasjonale standarar som er satt og gitt gjennom lover, reglar og planar.

Dette er slik sett utgangspunktet for FAU sine haldningar rundt foreldreinvolvering, foreldredeltaking og brukarmedverknad i skulen.

Kvar haust blir halvvparten av medlemmane i FAU bytta ut. Etter to år så er det såleis full utskifting i utvalet. Det gjer sine utfordringar i høve å få etablert gode rutinar og ein god kultur for det viktige samarbeidet som skal og må skje mellom skule/skuleeigar og oss som foreldregruppe i FAU.

Dei seinaste to åra har FAU vore veldig bevisste og målretta i høve til dette. Me har hatt – og har – eit sterkt ynskje om å vera ein aktiv og kritisk partnar til det systemet som har fått i oppgåve å gje ungane våre den opplæringa dei har krav på. Og det har bydd på mange utfordringar og mykje arbeidsinnsats. Både internt i foreldregruppa og eksternt i høve til skule og skuleeigar. Nybrottsarbeid i kulturbygging og forståing for samarbeid og felles fokus, er ikkje lett!

Me tykkjer likevel at det er verdt arbeidsinnsatsen – gjennom at me ser at me er ein bidragsytar og en viktig premissleverandør – og gjennom at me ser ei positiv utvikling i samarbeidet med skule og skuleeigar.

Me har møte i FAU ein gong i månaden. Arbeidsoppgåver vert fordelt, og gjennom dette får me også ein større deltaking og eit større engasjement. Me har det rimeleg ”høgt under taket” – men likevel med ein god tone!

Eg har sammenhengande hatt barn i skulen ved LØS dei siste 15 åra. Min erfaring med skulen som forelder, er i det vesentlegaste positiv. Dette er også noko som langt dei fleste foreldrekontaktane (altså dei som sit i FAU) gjer uttrykk for. At dei i det vesentlegaste er nøgde med skulen sin og elevane sine lærarar. Det er positivt og et særs godt utgangspunkt for vidare utviklingsarbeid når det gjeld samarbeid heim og skule.

Det seinaste året har me i FAU satt fleire tema på den politiske dagsorden. Me har mellom anna – overfor alle partistyra i Lærdal – spelt inn eit grunngjeve ynskje om etablering av ”politisk sektoransvar”. Dette etter vedtak i FAU av 11. januar 2011. Dette lyder;

Skule- og oppvekst på politisk dagsorden

Me som foreldre finn det urovekkjande at skule- og oppvekstpolitiske oppgåver vert satt i skuggen av andre viktige kommunepolitiske oppgåver under noverande politiske organisering. I dag er formannskapet einaste politiske bindeledd mellom oss som brukarar og kommunestyret som har det øvste ansvaret for det samla skuletilbodet og oppvekstilhøva for ungane våre.

Me som foreldre er opptekne av at ein i større grad må setja eit sterkare politisk fokus på skule- og oppveksttilhøva for kommunen sine barn og unge. Me meiner at dette betre kan skje gjennom eit større politisk engasjement og breiare politisk deltaking.

FAU ved Lærdalsøyri skule ber såleis kommunestyret i Lærdal om å starte opp arbeid med å greie ut ny politisk organisering som betre ivaretek kommunen sitt særskilte ansvar for skule og oppvekst.

Det var difor interessant at fleire av kommunepartia – som i dag sit med representasjon i kommunestyret, hadde etablering av politisk sektorutval – eller politiske hovedutval – med i sine valprogram no i haust når de skulle sanke røyster. Me som brukargruppe får difor ha håp om at den adminsitrative omorganiseringa – som kommunestyret seinare i dag skal behandle – vert fulgt opp med ei tilsvarande politisk organisering som ivaretek kommunen sitt særskilte ansvar for barn og unges oppvekstmiljø gjennom ei oppveksteining.

Fram til dette blir etablert, er det likevel positivt at de som kommunestyrepolitikarar prioriterer og tek del i eigen ”oppvekstdag” som den de no skal ha den 5. mars. Dette – i lag med ”politikarbesøk” på skulen vår – syner politikarinteresse for dette viktige ansvarsområdet.

Eg skulle likevel gjerne ha sett at kommunen sitt ”oppvekstomgrep” vart utvida til også å inkludere andre sentrale einingar og områder som har ei viktig rolle for ungane våre i barnehagar og skule. Eg tenkjer da primært på helsestasjon (som framleis er innafor eigen kommunal organisasjon) og til dei to viktige hjelpe- og samarbeidstenestene for oppvekst som PPT og barneverntenesta er. (Forøvrig to tenester som i dag henholdsvis Årdal og Aurland er vertskommunar for).

FAU ved LØS har eit sterkt ynskje om å få etablert eit ”Kommunalt Foreldrearbeidsutval”,  med representasjon frå alle foreldrearbeidsutvala i kommunen – både frå barnehage og skule. Gjennom dette trur eg at me både kunne stått sterkare som brukargruppe – samt at me som foreldre i større grad kunne fått satt felles utfordringar på sakskartet. Dessutan trur eg at det vil kunne gi synergieffektar ved at me gjennom eit samarbeid kan få til ei auka fellesskapstenking og gjera nytte av kvarandre sin ulike kompetanse. Me har alle det same målet for ungane våre – uansett om me har barna våre i barnehagane eller i skulane – og uavhengig av kor i bygda me bur!

Litt konkret om arbeidet til FAU. Me er aktive på sosiale medier. Dette gjennom vår eiga heimeside og gjennom ei eiga side på Facebook. Desse har me hatt sidan oktober 2010. På heimesida vår – der all informasjon ligg ute – (møteinkallingar, møtereferat, planar, korrespondanse osv) – har me hatt over 8000 visningar (treff) gjennom dette året. Vidare har me 125 faste følgjarar på facebook-sida vår – med ein variasjon på mellom 100 og 500 treff pr ”innlegg”. Her legg me også ut linkar og anna informasjon som me tykkjer er viktig å formidle. Eit døme er mellom anna i samband med FAU sin høyringsuttale omkring skuleturen i 10. klasse og omkring invitasjonen me har fått frå pedagogisk konsulent om ”Foreldreskule”. Bruk av sosiale media gjer at me får ut informasjon, og foreldra får høve til å koma med innspel til oss i foreldrearbeidsutvalet i forkant av FAU sine møter.

Me har satt skuleøkonomi på dagsorden. Fordeling av ressursar. Her ser det også ut til at utomhusplanen ved skulen skal bli ein gjengangar år etter år! Me har halde to større arrangement der foreldre og tilsette ved alle skulane har vore invitert. Bidragsytarar frå både eksterne og interne foredragshaldarar. I eit av desse møta orienterte også rådmannen for si utgreiing til styringsgruppa for ”Omstillingsprosjektet”. Rapporten og tilrådingane vart her gjennomgått og drøfta i og med foreldregruppa.

Me har tatt initiativ til å få etablert ein læringsplattform for skulane i Lærdal. Altså eit dataverktøy som til dømes ”Fronter” eller ”It’s learning” – som mellom anna gjer informasjonsutveksling mellom heim/skule mykje enklare og betre – samt frigjer mykje arbeidskrevjande og ”tungvindt” lærararbeid.

Me er imidlertid ikkje like positive til arbeidet kring temaet mobbeproblematikk i kommunen vår. Korkje frå skulen si side eller frå kommunen som ein heilskapeleg organisasjon. Me ventar – halvanna år etter at FAU satte temaet på dagorden – framleis på å få starta opp arbeidet med å få revidert handlingsplan mot mobbing ved skulen vår. Ein handlingsplan som FAU hausten 2010 valgte å ikkje godkjenne. Eg har forsikring frå rektor om at dette skal prioriterast framover – og FAU har forståing for at det i lengre tid har vore andre viktige og arbeidskrevjande oppgåver som har hatt fokus frå skuleleiinga si side. Me i FAU ynskjer likevel å oppmode til at kommunen – som organisasjon – i større grad set fokus på barn og unge sin kvardag i høve til det psykososiale oppvekstmiljøet. Me vil i så måte bidra som ein aktiv medspelar framover. Gjerne også gjennom ein gjensidig deltakande og forpliktande revidering av gjeldande ”Mobbemanifest” som FAU valgte å ikkje underteikna i april i fjor.

Dei økonomiske utfordringane har me i FAU jobba mykje med. Og me har også gitt uttrykk for vår sterke uro for at ein politisk ikkje prioriterer undervisningstilbodet til ungane våre høgare. Eg treng såleis ikkje nytta tid på å gjenta FAU si haldning til dette spørsmålet.

Som sagt – så registrerer eg at kommunestyret i dag skal handsame sak omkring administrativ organisering. Dette er ei sak som ikkje har vore debattert særskilt i FAU – grunna at den ikkje har vore offentleg kjent før den vart lagt ut i møteinkallinga til kommunestyret no den 20. januar. Altså for knapt ei veke sidan. Eg tillet meg likevel – ut frå dei meir generelle diskusjonar me har hatt i FAU – å meina at rådmannen og administrasjonsutvalet sin tilråding – om å gå frå to nivå til tre nivå – er ei klok avgjerd også sett frå vår side som brukargruppe. Så kan ein sjølvsagt meine mykje og mangt om korleis denne organiseringa er tenkt gjennomført vidare – men det ligg ikkje til FAU å ha noko meining om.

Det som me imidlertid har ei meining om, er som sagt den sterke uroa me har for dei økonomiske råmene som er gitt LØS. Dette vart også omtalt frå både rådmann og fleire av dei politiske representantane under kommunestyret si budsjetthandsaming for vel ein månad side. Rådmannen gav sågar uttrykk for at han var uroa for elevane sin rettstryggleik i høve til situasjonen. Det framstår difor som underleg at kommunestyret i dag – vel ein månad etter dette budsjettmøtet – skal ta avgjerd om ein skal opprette ei ny administrativ stilling som ”oppvekstleiar”. Ei stilling som ein i utgangspunktet ser rådmannen sin argumentasjon for - men som ein stiller spørsmål til finansieringa av.

I saksutgreiinga står det at ein tek vekk nokre av dei forvaltningsmessige oppgåvene som i dag ligg til rektorane og styrarane, og legg desse oppgåvene til stillinga som oppvekstleiar. Dette skal gi rom for auka fokus på pedagogisk rettleiing og oppfølging i dei attverande leiarstillingane, noko som vert trekt fram som eit viktig element for å heve kvaliteten i skular og barnehagar. I dette ligg ei reindyrking av rektorstillinga ved kvar av skulane og ei reindyrking av styrarfunksjonen for barnehagane. Det vert vidare synt til at stillinga som oppvekstleiar skal finansierast innafor eksisterande oppvekstbudsjett, og at evt endringar vil kome på pedagogisk personale, assistentar eller merkantilt personale.

Dette er vagt og alt for lite konkret i ei tid der situasjonen ved Lærdalsøyri skule framstår som særs alvorleg! Ei stilling som oppvekstleiar vil minimum ha ei nettokostnad på kr 800.000,- pr år. For meg som leiar i FAU framstår det difor som særs uklart korleis kommunen i dag – berre ein månad etter at kommunestyret synte til den alvorlege økonomiske situasjonen ved LØS – skal kunne prioritere oppretting av ein slik administrativ stilling innafor noverande skulebudsjett. Eit skulebudsjett som i dag ikkje eingong har økonomi til å leiga inn vikarar ved skulen.

Her har kommunen ei vesentleg utfordrande pedagogisk oppgåve føre seg i forhold til å få oss foreldre og skuleelevar til å forstå korleis denne stillinga skal finansierast innafor eksisterande skulebudsjett. Og samstundes evt kunne forsvare ei slik prioritering overfor foreldre og elevar.

Det er såleis med spenning eg ser fram til kommunestyret sin debatt av denne saka seinare i dag.

Igjen – takk for at me som brukarar av skuletenestene ved LØS fekk høve til å ha eit innlegg direkte for kommunestyret!

Etter at høyringsfristen gjekk ut den 8. desember, handsama formannskapet sakene på ny den 12. desember. Det er denne handsaminga som FAU i brevet – som er gjengitt nedanfor – har omtalt. Dette lyder;

Til:

Lærdal Ap v/gruppeleiar

Lærdal Sp v/gruppeleiar

Lærdal SV v/gruppeleiar

Lærdal H v/gruppeleiar

Lærdal V v/gruppeleiar

(NB Vert berre sendt som e-post)

Handsaming av budsjett 2012 og Økonomiplan 2012 – 2015

Syner innleiingsvis til formannskapet sitt budsjettvedtak av 12.12.11 i F-sak 179/11 (saksframlegg i K-sak 147/11) og økonomiplanvedtak av same dato i F-sak 180/11 (saksframlegg i K-sak 148/11).

FAU har merknad til mindretalet (SV og Ap) sitt framlegg i saka. I budsjettvedtaket for 2012 vart det av mindretalet ikkje gjort framlegg om auka råmer for Lærdalsøyri skule. Derimot vart det av mindretalet (ved SV) – i økonomiplanen – lagt fram ei auke for budsjettåra 2012, (2013 er ikkje nemnt), 2014 og 2015 med kr 300.000,- (frå kr 17.580.000,- til kr 17.880.000,-). Som kjent fall begge mindretalsframlegga med 2 stemmer (SV og Ap) som røysta for – og tre stemmer som røysta mot (Sp og H). Midretalet sitt framlegg byggjer også på at ungdomskuleelevane ved Borgund barne- og ungdomskule skal flyttast ned på Lærdalsøyri skule frå hausten 2012.

FAU vil syna til at formannskapet i sitt budsjettvedtak har sagt at; “dei tiltak som vert sett i verk skal vere basert på ei rettvis fordeling av ressursar.”

Det er i tidlegare budsjettuttale frå FAU synt til ressursfordelinga mellom elevane i dei ulike tre skulane i kommunen vår. Dersom me legg til grunn formannskapet sitt mindretal, vil LØS få 11 nye elevar til neste år. Gjeldande elevkostnad pr elev (ref budsjettrevisjon 2011) ved LØS er som tidlegare omtalt på kr 79.000,-. Dersom LØS får tilført 11 nye elevar – og ein ser føre seg at skulen får tilført kr 300.000,- (jfr igjen mindretalet sitt framlegg) - vil ressursane pr elev ved LØS faktisk reduserast frå kr 79.000,- til kr 76.000,- pr elev. FAU stiller såleis spørsmål om ei auka elevmasse ved LØS faktisk utløyser ei meir rettvis fordeling av ressursar som politisk er sagt skal gjelda.

FAU vil på ny syna til at stillingsressursane ved LØS – slik budsjettet ligg føre i dag (og ved mindretalet sitt fremlegg) er redusert med 2 stillingsheimlar for budsjettåra 2011 / 2012. Det er to store klassar – dagens 8. klasse (37 elevar) og 9. klasse (32 elevar) som ved tilføsel av elevar frå Borgund får ein storleik på 40 og 36 frå hausten 2012. Det er eit faktum at det pr i dag (2011) heller ikkje ligg inne ressursar til fulldeling av dei teoretiske basisfaga i noverande 9. klasse (32 elevar). Vidare er delinga i dei praktiske faga eit vesentleg problem (som også er omtalt i budsjettnotat frå rektor).

Ovannemnde utfordringar i høve klassestorleik gjeld for noverande 8. og 9. klasse. Dette betyr at det ved LØS allerede ved budsjettåret 2013 (vår) går ut ein av desse store klassane (noverande 9. klasse) – og ressurstrongen (delingsressursar) vert mindre.

For FAU er det viktig å synleggjera at det er i budsjettåret 2012 (og halve 2013) dei vesentlegaste utfordringane vil gjelda i høve til stillingsressursar ved LØS. For noverande 8. og 9. klasse er det kanhende grunnskulen sine to viktegaste år som står føre. Skuleår kor det siste grunnlaget for elevane sine vidare skulevalg og framtid vert gjort. Det er FAU sitt sterke ynskje at dette også vert synleggjort i budsjett for 2012 og økonomiplan.

FAU opprettheld såleis sitt krav om at LØS må få tilført ressursar i høve til den faktiske ressurstrongen!

Med helsing

FAU ved Lærdalsøyri skule

v/Hadle Blikra, leiar

Kopi: – FAU

- formannskap

- ordførar

- rådmann

- rektor ved Lærdalsøyri skule

- pressa

FAU ved Lærdalsøyri skule vil innleiingsvis syna til uttalen me gav i samband med budsjetthandsaminga for 2011. Me syner vidare til dei budsjettnotat som ligg føre frå rektor. Det har diverre synt seg at resultatet av dei knappe økonomiske råmene som inneverande år vart tildelt LØS, har gitt dei sterkt negative utslag som vart skissert og varsla om frå FAU i vår budsjettuttale frå desember -10. Me syner også til nylege innspel og synspunkt til budsjettarbeidet, gitt i eige brev til formannskapet av 22.11.11.

Det er i formannskapet sitt budsjettframlegg for 2012 lagt opp til ytterlegare vesentlege kutt i dei økonomiske råmene for Lærdalsøyri skule. Dette skjer trass i at formannskapet har lagt til grunn at ein politisk vil prioritera tilbodet til barn og unge.

2.0 Lærartettleik og fordeling av ressursar

Sidan lønsmidlar utgjer i underkant av 90% av skulebudsjettet, er det naturleg at hovudfokus på ressurssituasjonen må handla om stillingar og lærartettleik ved skulen.

Lærartettleik kan enklast forklarast som det kvantitative forholdet mellom tal elevar og tal lærarar / lærarårsverk. Det er i dag ingen norm for lærartettleik, men lærartettleiken må vera slik at det er tilstrekkeleg med lærarar til å organisere opplæringa slik opplæringslova krev. FAU meiner at ein ved LØS i dag ikkje oppfyller desse krava etter Opplæringslova.

2.1 Ressursfordeling

FAU vil tru at skuleeigar har eit overordna ynskje om å gje skuleelevane i kommunen ein god skule så kostnadseffektiv som mogleg. FAU meiner at skulestruktur og skulestorleik er nøkkelfaktorar for å kunne gjere dette, og at det er desse faktorane som såleis påverkar lærartettleik og kvalitet. Ved gjennomgang av revidert budsjett for 2011 kjem følgjande tal fram;

• Kostnad pr elev ved Borgund skule;   kr 173.000,-
• Kostnad pr elev ved Ljøsne skule;      kr 106.000,-
• Kostnad pr elev ved LØS;                    kr   79.000,-

Me har i tidlegare skriv (av 22.11.11) til formannskapet, stilt spørsmål om dette er ein rettvis fordeling av ressursane som vert tildelt skuleungane våre. Formannskapet har – også i sitt budsjettvedtak – sagt at ”dei tiltak som vert sett i verk skal vere basert på ei rettvis fordeling av ressursar.” Dette vert diverre berre tomme ord, om det ikkje samstundes er politisk vilje til å setja i verk tiltak som vil føre til ei meir rettvis fordeling av kommunen sine knappe ressursar.

Om me fordeler samla ressursbruk for alle tre skulane på alle elevane, får me ein elevkostnad på omlag kr 93.000,- pr elev. Dette er tilnærma likt landssnittet for vår “kommunegruppe” (ref KOSTRA – gruppe 03). Basert på desse tala manglar Lærdaløyri skule omlag 2,8 mill kroner for å ligge på eit slikt gjennomsnitt pr elev.

Det har vore stilt spørsmål om FAU sine tal og utrekningar i samband med brev av 22.11.11 er korrekte. Tala er kvalitetssikra og omfattar berre funksjon 202 – skule. Me syner også til tabell 10 på side 17, i utlagt Økonomi- og handlingsplan 2010 – 2015.

2.2 Kompetansekrav og likeverdig opplæring

Det vert stadig stilt større krav til kompetanse for undervisning i dei einskilde faga. Kunnskapsløftet og kravet til ein framtidsretta skule krev større fagleg mangfald og kompetanse. I GSI-rapporteringa (Grunnskulens informasjonssystem) for skuleåret 2010 / 2011 er det synt til at det ved ungdomstrinnet ved Borgund skule vert gitt undervisning av personell utan godkjent undervisningskompetanse for ungdomstrinnet.

Likeverdig opplæring skal sikrast gjennom lover, forskrifter og læreplanar. Det er gitt kommunane eit betydeleg delegert ansvar og avgjerdsmynde. I både regjeringserklæringane Soria Moria 1 og 2, er det sagt at lærartettleiken i norsk skule skal aukast. Dei siste 6 – 7 åra er det nasjonalt vedteke fleire undervisningstimetal i grunnskulen. Dette er ikkje fylgt opp i same grad med økonomiske midlar. Det er fagleg semje om at det er relasjonen mellom lærar og elev som avgjer kvaliteten i undervisninga. Dette er vidare eit spørsmål om tilgjengelegheit og lærartettleik.

FAU forventar at politikarane i Lærdal føl opp både lokale konkrete løfter som vart gitt i samband med kommunevalet no i haust – og i høve til det som nasjonalt gjennom regjeringa er lova. Vidare forventar me at dei ulike overordna kommunale målsetjingar og vedtak som er nedfelt og uttrykt i gjeldande planverk og budsjett, vert fulgt opp. Lærartettleiken er i høg grad eit økonomisk spørsmål – og FAU krev at Lærdalsøyri skule vert tilført midlar som sikrar eit forsvarleg pedagogisk tilbod til skuleborna våre.

2.3 Fråværstatestikk og vikarmidlar

Vikarmidlar er ikkje budsjettert. Skuleeigar bør vera kjent med det store sjukefråværet som over tid har vore ved LØS. Kan hende burde ein også politisk stille seg spørsmål om det er ein samanheng mellom knappe ressursar og høgt sjukefråvær? Ved gjennomgang av gjeldande fråværstatestikk inneverande år, kjem det fram at om lag 2 årsverk ved LØS fell vekk i ulikt fråvær, (pr oktober 377 dagsverk). Når me samstundes veit at det er omlag 22 stillingsheimlar i skulen, så utgjer 2 årsverk vesentlege ressursar. At elevane ved LØS såleis ikkje får rettmessig undervisning og berre ’tilsyn’ – samt at klassar kan bli permiterte og sende heim – er sjølvsagt ein situasjon som me i FAU ikkje kan akseptera. Vidare vil ein stram bemanningssituasjon ikkje opna for større fleksibilitet i høve til ulik samansetjing av grupper og ein fleksibel undervisningssituasjon. Viktige kompetansehevande tiltak for undervisningspersonell vert det heller ikkje gitt rom for. FAU krev såleis at det vert sett av midlar til vikarbruk. Dette tilsvarande minimum ein 50% pedagogstilling.

2.4 Fordeling av ressursar mellom ordinær undervisning og spesialundervisning

Tal vedtak om spesialundervisning aukar. Det er i utgangspunktet bra at fleire får den hjelp dei treng og har krav på, men FAU vil syne til at det lett kan bli ein vond sirkel at manglande ressurstilgang til vanleg ordinær og tilpassa undervisning aukar trongen for spesialundervisning. Det er vidare eit varsko at over 37% av dei samla lønsmidlane ved skulen i dag vert nytta opp mot spesialpedagogiske tiltak til om lag 30 elevar (17% av elevmassen. (Landsgjennomsnittet er knapt 7%)). Det er vanskeleg tilgjengelege tal for fordelinga mellom pedagog og assistent (ufaglært), men ut frå budsjettnotat av 22.11.11 vil ein estimert kunne seie at om lag 55% av dei spesialpedagogiske tiltaka vert gitt gjennom ufaglærte assistentar.

2.5 Administrativ omfordeling

FAU ser positivt på at formannskapet har gitt rektor (einingsleiarane) høve til å administrativt prioritera omfordeling (”mindre kutt”) innafor ei kostnadsråme på kr 100.000,-. Dette gjer større handlefridom og moglegheit for at også brukargruppa, gjennom FAU, får høve til å påverka einskilde ressursprioriteringar i skulen. Dog ikkje innafor det området som betyr mest for skuleborna våre; ressursar til pedagogisk personale og lærartettleik.

3.0 Krav frå FAU om auka økonomisk råme

FAU meiner det er godt dokumentert at det er uforsvarleg å redusera LØS med to årsverk (budsjettåra 2011 / 2012) slik elevmassen er pr i dag. Det er to klassar – noverande 8. og 9. klasse – som er av ein storleik som gjer det naudsynt med meir deling enn det som kan gjennomførast med dei knappe ressursane som formannskapet har lagt inn for skulen. Me vil såleis setje fram eit krav om at råma må aukast med minimum 1,2 mill kr utover det som er lagt inn. Dette tilsvarande 1,5 lærarårsverk kr 825.000,- (kr 550.000,- x 1,5), 0,5 assistent kr 100.000,- (som er tatt ut frå 01.08.12 i budsjettframlegget), nettobudsjetterte vikarutgifter kr 235.000,- (0.5 pedagogstilling – med kr 40.000,- lagt inn i ref sjukepengar) og midtskyss kr 40.000,-.

Sjølv ved ein slik omfordeling av ressursar / auke i råme, vil kostnadane pr elev ved Lærdalsøyri skule ligge vesentleg under landsgjennomsnittet i kommunegruppe 03 (KOSTRA), jfr også pkt 2.1 ovanom.

4.0 FDV / reinhald

FAU gjer også tilkjenne uro ved formannskapet sin sterke reduksjonen av FDV i kommunen (teknisk). Dette i samband med at det er denne avdelinga som mellom anna utfører reinhald ved LØS. Den omfattande bemanningsreduksjonen som formannskapet legg opp til innafor dette tenesteområdet må naturlegvis gå ut over mellom anna reinhald ved LØS. Me kan ikkje akseptera at manglande økonomiske ressursar fører til eit reinhald som ikkje er i tråd med gjeldande krav og retningsliner. FAU legg til grunn at det ligg føre godkjente reinhaldsplanar for LØS. I den grad redusert reinhald fører til endring av gjeldande reinhaldsplanar – må desse godkjennast før endringar vert gjort. Me minner om at det vert stilt store krav til elevane sitt arbeidsmiljø og syner i den forbindelse spesielt til Opplæringslova kap 9a – Elevane sitt skulemiljø.

5.0 Investeringsbudsjettet / Økonomiplan

FAU har merka seg kommunen sin økonomiske situasjon også i høve til investeringar. Trass i manglande investeringsmidlar reagerer me på at uteområdet ved LØS nok ein gong synest å bli skyvd fram i tid. FAU registrerer samstundes at formannskapet ”oppmodar foreldregrupper i skule og barnehage til å bidra med dugnadsinnsats i høve gjennomføring av investeringar”. Me ynskjer å bidra i det arbeidet som står framføre oss – men me krev då at samla budsjettmidlar (1 mill kroner) vert lagt inn i driftsåret 2012. Dette for – på ny – å unngå at dette viktige investeringstiltaket vert skyvd ut i tid og at me som foreldregruppe får starte opp arbeidet med å planleggje vår dugnadsinnsats.

6. Avslutning – oppmoding om sams forståing av skuletilbodet ved LØS

Avslutningsvis vil FAU syne til at det gjennom år har blitt stilt politisk spørsmål ved drifta av Lærdalsøyri skule. Om ressursbruk og prioriteringar. Det kan synast som om det er ulik vurdering mellom politisk og administrativt nivå om desse spørsmåla. I den grad det framleis vert stilt politisk spørsmål om korleis den interne ressursfordelinga kjem til uttrykk – og kva som vert vektlagt innafor dei ressursar som er disponible – ber FAU om at kommunestyret vurderer trong for forvaltningsrevisjon av skulane i Lærdal, jfr kontrollutvalsak 23/2011 – Førebuing av plan for forvaltningsrevisjon 2012 – 2015. Dette for at me som brukargruppe ikkje skal oppleve at skuleeigar og skuleleiing kommuniserer ein ulik vurdering av det tilbodet som vert gitt til elevane ved skulane i Lærdal.

Me som foreldre ynskjer å vera ein positiv bidragsytar til elevane si læring – og i dialogen og samarbeidet med skuleeigar og skuleleiing. Då har me også ei von om at me som brukargruppe vert høyrde i dei viktige høyringsprosessar som gjeld framtida for ungane våre og framtida for lokalsamfunnet vårt!

Uttalen er samrøystes vedteke i FAU 7. desember, jfr sak 3

Diverre kan det sjå ut som at det er ein lang veg å gå før desse prinsippa blir gjort gjeldande fullt ut. Mellom anna er det i gjeldande budsjettnotat (som skal handsamast og vedtakast i formannskapet den 24. november) ikkje funne budsjettmidlar til investeringar i det heile. Tidlegare inngåtte og forplikatande økonomiske avtalar må finansierast gjennom sal av eigedom.

- O -

FAU ved Lærdasløyri skule har registrert at det i noverande budsjettprosess har kome innspel frå ulike interessegrupper i samband med formannskapet sine to tidlegare budsjettmøter (1. november og 17. november). Desse innspela har i stor grad stilt spørsmålstegn med dei utgreiingar og konklusjonar som ligg føre i “Omstillingsprosjektet” og i “Rapport om flytting av ungdomssteget”.

Administrasjonen sin rapport i “Omstillingsprosjektet” vart offentleg gjort kjent for over eit halvt år sidan, den 12. mai -11. Rådmannen har – overfor alle foreldrerepresentantar – orientert om konklusjonane i rapporten. Dette gjennom eigne møter på Lærdaløyri den 25. mai og på Borgund den 26. mai. I tillegg syner rapporten at både tilsette og tillitsvalde gjennom eigne møter er orientert om innhaldet i rapporten.

Det var formannskapet og hovedtillitsvalde for Fagforbundet og Utdanningsforbundet som var styringsgruppe for “Omstillingsprosjektet”. Fleirtalet i styringsgruppa ba om ei tilleggsutgreiing i høve flytting av ungdomskulen på Borgund ned på Øyri. Dette med fokus på skyss, reisetid og sosiale konsekvensar, jfr ovannemnde rapport. Også denne konkluderer med ei tilråding om at ungdomssteget ved Borgund vert flytta ned til Øyri.

I motsetning til delar av det politiske miljøet og ulike andre interessepartar i saka, vil FAU ved Lærdalsøyri skule forholda seg til at dei utgreiingar som er gjort i saka er kvalitetssikra og korrekte. Me aksepterer ikkje at andre interessegrupperingar, som til dømes SU ved Borgund skule, i sine utsegner kjem med urett informasjon og gjer seg til talspersonar for elevane ved Lærdaløyri skule. Det er uryddig!

Korleis vert midlane til elevane ved dei ulike skulane fordelte i dag?

Er det ei rettvis fordeling? Kan ein få meir utav kvar krone? Er det politisk vilje og ynskje om å sjå heilskapleg og framtidsretta på det samla skuletilbodet som kommunen skal gje skuleelevane i åra som kjem? Vil ein politisk sjå framover – eller vil ein oppretthalde gamle ordningar og strukturar for ein kvar pris? Vil politikarane handla etter det dei sa i budsjettvedtaket frå desember 2010;

”Rådmannen får i oppdrag å gå gjennom organiseringa av skule og barnehagetenesta vår, der ein ser på den samla ressursbruken, fordelinga av ressursane mellom dei ulike delane av sektoren og kvaliteten målt mot ressursbruk. Utgangspunktet for eventuelle tiltak skal vere ei heilskapeleg vurdering av tenesta, dvs skuletilbodet i Lærdal og barnehagetilbodet i Lærdal. Formannskapet meiner gjennom dette at kvaliteten i skulen skal hevast med same ressursbruk som i 2010.”

I drøftingar om skulestruktur er det lett å fokusere på dei som opplever at dei ”misser” noko. Isolert sett har dei eit godt tilbod i dag, men i ei stode med knappe ressursar så har dette konsekvensar for alle. Utan endringar vert reelt sett deira behov prioriterte framføre mange andre. Det er grunn til å reise spørsmålet om det er rettvist.

Ved gjennomgang av revidert budsjett for 2011 kjem følgjande tal fram;

• Kostnad pr elev ved Borgund skule;  kr 173.000,-
• Kostnad pr elev ved Ljøsne skule;     kr 106.000,-
• Kostnad pr elev ved LØS;                 kr   79.000,-

Er dette ei rettvis fordeling av ressursane som vert tildelte skuleungane våre?

Korleis kan ein forsvare at ressursfordelinga vert endå skeivare med at det igjen skal hentast inn vesentlege pedagogiske ressursar ved Lærdalsøyri skule til neste år?

Om me fordeler samla ressursbruk for alle tre skulane på alle elevane, får me ein elevkostnad på omlag kr 93.000,- pr elev. Dette er tilnærma likt landssnittet for vår “kommunegruppe” (ref KOSTRA). Basert på desse tala manglar Lærdaløyri skule omlag 2,8 mill kroner for å ligge på eit slikt gjennomsnitt pr elev. For Borgund vil ein koma ned på landssnittet (gjennomsnittet på kr 93.000,- pr elev) ved ein reduksjon på omlag 2,1 mill kr. Dette er dei klåre og objektive økonomiske fakta i saka.

FAU ved Lærdalsøyri skule krev at politikarane tek inn over seg kommunen sin økonomiske situasjon og gjer dei naudsynte politiske grep som vil føre til ei meir rettvis fordeling av ressursane for alle elevane i kommunen vår!

Fordelinga må komma til uttrykk gjennom ei omfordeling av ressursar der elevane ved Lærdalsøyri får stetta eit minimumskrav til ressursar knytt til undervisninga. Dette gjennom auka økonomiske midlar i tråd med kva som gjeld for kommunegruppa (GR3, jfr over).

FAU vil koma attende med ein eigen uttale til formannskapet sitt endelege budsjettframlegg, (høyringsfråsegn).

Dette innlegget vil også bli sendt formannskapet der me ber om at ovannemnde innspel blir tatt med under formannskapet si slutthandsaming den 24. november. Me syner i så måte til at formannskapet – i sitt budsjettarbeid – er forelagt innspel frå andre interessegrupper i høve budsjettarbeidet.

Rektor gav oss omvisning på skulen og me fekk helsa på fleire klassetrinn. Me vart alle imponert over danseglade elevar i 6. klasse som synte fram folkedans og elevar i 5. klasse som sang og spelte for oss. I småskulen orienterte Ingebjørg litt om Zippys vener, og gjestene synte stor interesse for korleis skulen praktisk nytta dette flotte undervisningsprogrammet som mellom anna handlar om å identifisera og snakke om følelsar, samt å meistre daglege problem og støtte andre som har det vanskeleg.

9. klasse fekk ei kort orientering om tilhøva for palestinske skuleborn. Det var sterke kontrastar som vart synt gjennom bilete av enkle undervisningslokale laga av spinkle materialar med bølgeblekk til tak. Diselagregat til straum og manglande sanitærtilhøve. Likevel glade elevar som synte takksemd for at dei fekk høve til å læra ved å få gå på skule.

Me fekk også vitja SFO og fleire av elevane fekk helsa på besøket frå Jeriko. Det var spanande – og litt skummelt – å snakka engelsk.

Det var to svært nøgde gjester frå Jeriko som avslutta sitt besøk ved skulen etter skuletid i dag! Rektor fekk mykje ros og god omtale for skulen og alt dei hadde fått sjå av den flotte skulen vår gjennom dagen. Dette både av innhald og skule- og undervisningslokale. Dei synte også takksemd og stor glede over korleis skulen tok i mot dei!

Som foreldrerepresentant var det kjekt å bli invitert til besøket. Det var både spanande og lærerikt å få delta på denne dagen!

FAU har stila brev til skuleleiinga i samband med manglande tilbod om symjeundervisning i faget “kroppsøving” for mellomtrinnet og ungdomstrinnet. Porten hadde oppslag om saka same dag som FAU handsama saka.

At undervisningstilbodet som vert gitt til elevane skal vera avhengig av klassestorleik, er ikkje akseptabelt. Denne saka synleggjer imidlertid at klassestorleik er avgjerande for undervisningstilbodet som vert gitt til til elevane ved Lærdalsøyri skule.

FAU har også reagert på prosessen kring innsparingstiltaket og har i brevet til skuleleiinga bedt om ei nærare orientering om også dette. FAU har ved gjentekne høve etterlyst dialog og informasjon kring vesentlege endringar som vert gjort i høve elevtilbodet, seinast i møte i SU (Samarbeidsutvalet) den 8. juni i år.

I årsmeldinga for FAU sitt arbeid forrige skuleår – 2010/2011 – vart det uttrykt at me som utval opplevde vanskar i dialogen med skuleeigar og skuleleiing.  Me i FAU har drøfta gjennom denne utfordringa og tatt avgjerd om at me inviterer skuleeigar/skuleleiing til eit ‘dialogmøte’ med FAU den 20. oktober.  Dette fordi me har von om at konstruktiv dialog og ansvarleggjering kan føre til eit betre samarbeid mellom foreldre som brukargruppe og kommunen/skulen som tenesteytar.

Me ser fram til eit spanande skuleår. Følg med oss på heimesida og facebook-sida vår. Og kom gjerne med innspel og kommentarar til oss gjennom både desse nettstadene og gjennom klassekontaktane som alle er representert i FAU!

Foreldre og føresette

ved Lærdalsøyri skule, Ljøsne skule og Lærdalsøyri barnehage

- 0 -

FAU ved Lærdalsøyri skule inviterer til felles foreldremøte i samband med rådmannen sin administrative utgreiing kring ressursfordelinga i kommunen sine skular og barnehagar.

Møtet vil finna stad i Lærdal Kulturhus

onsdag den 25. mai – kl 18.oo

Rådmannen har som kjent lagt fram ein administrativ utgreiing – ‘Omstillingsprosjektet’ – som omhandlar oppvekstsektoren. Me vil få ein gjennomgang av dette arbeidet frå rådmann Alf Olsen jr. Det vert gitt høve for å stille spørsmål frå oss foreldre undervegs. (De finn rapporten på kommunen si heimeside)

Det vert enkel servering ved sal av kaffi og kaker.

Invitasjonen skjer i samarbeid med Lærdal kommune og med FAU ved Ljøsne skule og FAU ved Lærdalsøyri barnehage. FAU ved Borgund skule / barnehage har bedt om eigen orientering til sine foreldre og føresette, og er såleis ikkje deltakande. Foreldre / føresette også frå Borgund er likevel sjølvsagt velkomne.

Me vonar at flest mogleg set av ein del av denne maikvelden til dette viktige orienteringsmøte!

Sjå elles gjennom utlagt ‘Årsmelding’ og kom gjerne med innspel!

«Engasjerte foreldre for ein betre skule»!

Vel møtt!

Helsing Foreldrearbeidsutvalet ved Lærdalsøyri skule

Me har delteke (v/leiar) på kommunestyret sin temadag kring “skule og oppvekst” (11. november 2010), og kor FAU hadde eige innlegg. I januar i år arrangerte me i lag med foreldrearbeidsutvala på Borgund skule og Ljøsne skule, ope møte på Kulturhuset med tittelen “Til motivasjon for samarbeidet mellom heim og skule”. Me hadde innlegg frå representantar frå både kommuneleiing, FUG (Foreldrearbeidsutvalet for grunnopplæringa) og Kaupanger skule.

FAU har som kjent fått etablert si eiga heimeside og oppretta eiga side på Facebook. Dette gjer at me lettare når ut til foreldre og føresette, samt at foreldre og føresette lettare skal kunne få innsikt i kva arbeid som vert gjort i FAU.

Me har fått utarbeida eigne vedtekter for FAU. Vidare har me vore ein pådrivar for å få etablert eit nytt ordensreglement for Lærdalsøyri skule og som også innheld reaksjonsmåtar. FAU valgte å ikkje godkjenne gjeldande ‘Handlingsplan mot mobbing’, og deltek med to representantar i ei gruppe som har som oppgåve å utarbeide ny handlingsplan. Dette arbeidet er ikkje sluttført endå.

Me har gitt uttale til både skulebudsjett og økonomiplan. Me har også arbeida med – og gitt uttale i saka som omhandlar uteområdet ved skulen.

FAU har gitt innspel til kommunen om at me ynskjer oppretting av politisk sektorutval for skule/oppvekst. Dette for å få eit sterkare politisk fokus på skule- og oppveksttilhøva for kommunen sine barn og unge.

Me har gjort forsøk på å få til eit samarbeid med kommunen og andre instansar omkring haldningsskapande arbeid for rusfri ungdomstid.

Nå er igjen å arrangera møte i Foreldrerådet som er tidfesta til 25. mai kl 18.00 i Kulturhuset. Vidare vil FAU i etterkant av møte i Foreldrerådet gje ein uttale til rådmannen sitt framlegg i “Omstillingsprosjektet” som omhandlar skule og oppvekst.

Oppsummert kan me seie at skuleåret 2010 / 2011 har vore eit år kor det har vore mykje aktivitet i FAU. Det kjennest diverre noko vanskeleg å få til den dialogen me ynskjer i høve til skuleeigar og skuleleiing. Dette spesielt i høve til respons og attendemelding på saker som me har spelt inn til desse. Dette har me imidlertid ei von om at skal bli betre!

Lærdal, den 16. mai 2011

Hadle Blikra

leiar